- जाकिर हुसैन - 
१७ नोभेम्बर शारजाह । शारजाहको अल्-बद्दाद इन्टरनेशनल कम्पनीमा कार्यरत ३२ जना नेपाली कामदारको भिसा एकैपटक रद्द गरिएकोछ । उक्त कम्पनीमा कार्य गर्दै आएका केही नेपाली कामदारहरुले विभिन्न असन्तुष्टि व्यक्त गर्दै काम छोडेर व्यवस्थापनसँग आफ्नो माग राखेपछि व्यवस्थापनले उनीहरुको मागलाई अर्थपूर्ण ढंगले लिएर उनीहरुको भिसा रद्द गरेकोछ । 

उक्त कम्पनीको मार्केटिग डिभिजनमा काम गर्ने हरिबहादुर श्रेष्ठका अनुसार नेपाली कामदारहरुसँग राम्रो व्यवहार नभएको उनीहरुको तलब तीन तीन महिनासम्म रोकेको बस्ने सुविधा राम्रो नभएको खाना पकाउन उचित भान्साघरको व्यवस्था नभएको नेपालीहरुसँग मानवजस्तो व्यवहार नभएको आदि कारणले ७० जनाको समूहले काम छाडी उक्त समस्याहरुको निराकरणका लागि माग राखेको थियो । कम्पनी व्यवस्थापन र कामदारहरुबीच सहमति हुन नसक्दा कम्पनी व्यवस्थ्पनले ३२ जना कामदारको भिसा रद्द गरेकोछ । उक्त कामदारहरुलाई घर पठाउने तयारी भइरहेकोछ । बाँकी कामदारहरु पुनः काममा फर्किसकेकाले कम्पनीले उनीहरुको भिसा रद्द नगरी बरु उनीहरुको तलब सुविधासमेत बढाइदिने जानकारी समाजसेवी कृष्ण ढकालले व्यवस्थापन पक्षबाट पाएको बताउनुभएकोछ ।
उक्त समस्याबारे यी नेपाली कामदारहरुले नेपाली राजदूतावासलाईसमेत जानकारी दिएपछि दूतावासका दुई जना कर्मचारी र समाजसेवी कृष्ण ढकालको एउटा समूहले उक्त कम्पनीको प्रशासनसँग भेट गरी समस्या समाधान गर्ने जमर्का गरेकोथियो । समाजसेवी कृष्ण ढकाल भन्नुहुन्छ हाम्रा नेपाली भाइहरुले के कारणले त्यस्तो हडताल गरेका हुन् वा कसको उक्साइमा परेर त्यस्तो कदम चालेका हुन् बुझ्न सकिएन । कम्पनीले गरेको सम्झौता-पत्र मुताबिक तलब र बस्ने सुविधा दिइएको छ । पुराना कामदारहरुले राम्रै तलब पाइरहेकाछन् । कम्पनीले हामीलाई यी कामदारहरुका प्रतिनिधिहरुकैअगाडि एगि्रमेन्ट पेपर देखाए र उनीहरु लाजवाफ भए ।

ढकालका अनुसार उनले एकदिन अगाडि यी कामदारहरुलाई भेटेर काममा जान मनाएपछि स्थिति अलिक साम्य भएको थियो । केही कामदारहरु बिहानै काममा नगएको भए समस्या अझ बिग्रन सक्थ्यो र ७० जना नेपालीको भिसा एकसाथ रद्द हुने सम्भावना थियो ।
ढकाल भन्नुहुन्छ यस किसिमको घटनाले नेपालीहरुको छवि यू एइ मा बिग्रन सक्ने सम्भावना हुन्छ । यू एइ को श्रम कानून नजानेकाले हाम्रा नेपाली दाजुभाइहरु सानो सानो समस्याकोलागि युनियनबाजी र हडताल आदि गर्न थाल्छन् जुन यूएईको कानूनले पटक्कै स्वीकार्य छैन । उनीहरु रीतपूर्वक समस्या समाधानमा लाग्नुको सट्टा हाम्रै पाराले हडतालमा उत्रेपछि समस्या झन् बिग्रन्छ । हाल विश्वबजार संकटमा परेको अवस्थामा यूएईको बैंकिङ्ग र प्रोपर्टीको क्षेत्र निकै डामाडोल भएको स्थितिमा यूएईका ठूला कम्पनीहरुले धमाधम कर्मचारी र कामदारमा कटौति गर्नुकासाथै नयाँ कामदार भर्ती गर्न रोकेको अवस्थामा नेपालीहरुले यस स्थितिलाई बुझ्नु जरुरी छ ।